USAJILI WA WACHEZAJI MWAKA 2011 HADI 2012

USAJILI WA WACHEZAJI 2011/2012
Klabu zote 14 ziliwasilisha usajili wa wachezaji wao, wakiwemo wa kikosi cha
pili (U20) ndani ya wakati. Kwa upande wa wakubwa (seniors) timu hizo zimesajili
kwa idadi ifuatayo; Oljoro JKT 23, African Lyon 23, Ruvu JKT 23, Toto African
23, Moro United 24, Coastal Union 25, Polisi Dodoma 25, Ruvu Shooting 26, Azam
26, Kagera Sugar 26, Simba 26, Yanga 28, Villa Squad 28 na Mtibwa Sugar 30.

PINGAMIZI KWA WACHEZAJI
Klabu tatu za daraja la kwanza zimeliandikia Shirikisho la Mpira wa Miguu
Tanzania (TFF) zikiweka pingamizi kwa wachezaji wao waliosajiliwa katika klabu
nyingine za Ligi Kuu ya Vodacom.

Polisi Morogoro inapinga wachezaji wake Majaliwa Shabani Mbaga, na Shomari
Kapombe ambaye Simba imemuombea usajili kusajiliwa na timu nyingine kwa vile
bado ina mkataba na wachezaji hao.

Nayo Majimaji ya Songea imeweka pingamizi kwa wachezaji wake kumi na moja (11)
inaosema kuna tetesi kuwa wamesajiliwa na klabu mbalimbali za Ligi Kuu ya
Vodacom, lakini hawajafanyiwa taratibu za uhamisho ingawa bado wana mikataba na
timu hiyo.

Wachezaji hao ni Said Mohamed (Yanga), Juma Mpola, Evarist Maganga, Kulwa Mobby,
Ally Bilaly (Villa Squad), Mohamed Mpola, Paul Ngalema, Lulanga Mapunda, Hamad
Waziri, Yahya Shaban Haruna na Ulimboka Mwakingwe (Simba).

Kwa upande wa AFC ya Arusha kupitia kwa Mwenyekiti wake Peter Temu imesema hadi
siku ya mwisho ya uhamisho wa wachezaji- Julai 15 mwaka huu hakuna mchezaji wake
aliyekuwa ameombewa uhamisho kujiunga na timu nyingine.

Hivyo inaweka pingamizi kwa wachezaji wote wenye mikataba na klabu hiyo
kusajiliwa na timu za Ligi Kuu ya Vodacom, na kwa mchezaji atakayekuwa
amesajiliwa si halali kwa vile uhamisho wote ni lazima uidhinishwe na Mwenyekiti
wao.