FAINALI EURO 2012-SPAIN V ITALY; KESHO NANI MBABE

Wote ni Makocha makini na watulivu, Vicente Del Bosque na Cesare Prandelli, lakini mmoja wao ndio ataibuka Shujaa wa Ulaya baada ya Timu zao, Spain na Italy, kucheza kwenye Fainali ya EURO 2012 Uwanja wa Olimpiki huko Kiev, Ukraine Jumapili Julai 1.

Kwa Del Bosque, Fainali hii ni kipimo dhahiri cha jinsi Nchi yake Spain ilivyotawala Soka la Dunia tangu watawale EURO 2008 na kufuatia Kombe la Dunia Mwaka 2010 na sasa wapo kwenye nafasi nzuri ya kuweka historia ya kuwa Nchi ya kwanza huko Ulaya kufanikiwa kutetea Taji lao la Ulaya tangu Mashindano hayo kuanzishwa.

Kwa Prandelli, Timu yake Italy, iliingia Fainali hizi za Ulaya bila kutegemewa kufanya maajabu yoyote lakini walianza vyema walipotoka sare ya Bao 1-1 na Spain katika Mechi ya ufunguzi ya Kundi lao la EURO 2012 Wiki 3 zilizopita.

Del Bosque ndie aliekuwa Kocha wa Real Madrid enzi za “Galactico” akiwaongoza Nyota Zinedine Zidane, Luis Figo na Straika wa Brazil Ronaldo na kuweza kufanikiwa kutwaa UEFA CHAMPIONZ LIGI mara mbili.

Akiwa na Spain inayotumia falsafa ya uchezaji wa aina ya “Tiki Taka”, ambayo kimsingi ni kutoa pasi na kuondoka, Del Bosque, mara baada ya kuibwaga Portugal kwenye Nusu Fainali kwa matuta, alisema: “Tunachotaka ni kucheza staili ya Soka ambayo tunayoiamini na kuweka historia.”

Kwa kumkosa David Villa ambae ni majeruhi, Del Bosque amelazimika kuchezesha Viungo 6 na bila Straika anaetambulika.

Kocha wa Italia Prandelli hana matatizo ya aina hiyo na bila shaka atawategemea Mastraika wake Antonio Cassano na Mario Balotelli ambao wamekuwa waking’ara huku Balotelli akipiga Bao mbili zilizowabwaga Germany 2-1 kwenye Nusu Fainali.

Mara baada ya Italy kufanya vibaya kwenye Kombe la Dunia Mwaka 2010 na kutolewa hatua ya Makundi kwa kwenda sare na Paraguay na New Zealand kisha kufungwa na Slovania, Prandelli alikabidhiwa Timu ya Italy ili kuijenga upya.

Tangu wakati huo, Timu ya Italy, chini ya Prandelli, haijafungwa kwenye Mechi yeyote ya Mashindano rasmi na kwenye hatua za mchujo za EURO 2012, Italy walishinda Mechi 8 kati ya 10 na kufunga bao 20 na kufungwa mbili tu.