SIKU KUBWA YA ALBINUS NA UBINGWA WA DUNIA YAWADIA

 

Kampuni ya Kinda Boxing Promotions ikishirikiana na kampuni ya Warriors Promotions CC zote za Namibia leo waliitisha mkutano wa waandishi wa habari katika ofisi za Bodi ya Mieleka na Ngumi ya Namibia kulitangaza pambano kati ya bondia Albinus Felesianu wa Namibia na Herbert Quartey wa Ghana. 

Mpambano huo wa kugombea mkanda wa ubingwa wa dunia wa IBF kwa vijana katika uzito wa Super Featherweight, utafanyika kwenye ukumbi wa mikutano wa Windhoek Country Club and Casino tarehe 29, Machi mwaka huu na linatagemewa kuwa pambano kubwa lililowahi kutokea katika nchi ya Namibia.

Wageni rasmi na muhimu waliohudhuria mkutano huo ni pamoja na Rais wa IBF katika bara la Afrika, Ghuba ya Uajemi na Mashariki ya Kati Mtanzanai Onesmo Ngowi pamoja na bwana Oiva Angula ambaye ni Meneja Mkuu wa kampuni ya Simu ya Telecom nchi Namibia.

Rais Ngowi aliahidi ushirikiano wa IBF katika kukuza ngumi katika nchi ya Namibia na kuihamashisha serikali ya nchi hiyo kuwa pamoja na uwekezaji inaoufanya kwa sasa ni muhimu pia iwekeze zaidi katika kujenga na kuendeleza miundombinu endelevu ya mchezo wa ngumi. Ngowi aliihakikishia nchi ya Namibia kuwa IBF daima itakuwa mshirika wa karibu katika maendeleo ya ngumi ya Namibia. Rais Ngowi yuko nchini Nmibai kusimamia pambano la ngumi la ubingwa wa kimataifa katika uzito wa Bantam kati ya bondia Immanuel “Prince” Naidjala wa Namibai na Lesley Sekotswe kutoka nchini Botswana litakalofanyika leo saa moja unusu usiku katika ukumbi wa Windhoek Country Club and Casino. 

Naye meneja wa Telecom Namibia bwana Angula alitangaza rasmi mpango kabambe wa kuijenga uwezo tasnia ya ngumi ya Namibia kwa kugawa vifaa vya mchezo huo kwa wadau mbalimbali pamoja na kujenga uwezo kiufundi kwa wale wote wanaosimamia mchezo wa ngumi nchini Namibia kwa sasa.

Bwana Angula alimhakikishia Rais Ngowi kuwa Telecom Namibia daima itakuwa mstari wa mbele katika kuchangia maendeleo ya ngumi nchi humo!

Albinus Felesianu anakuwa bondia wa kwanza kutoka Namibia kugombea mkanda wa dunia wa IBF na hii inaleta hamasa kubwa katika taifa hili la watu wapatao milioni mbili na ushee!