YANGA VS MGAMBO SHOOTING 1-1

YANGA imejiweka katika wakati mgumu wa kutwaa ubingwa wa Ligi Kuu Tanzania Bara, baada ya kuambulia sare ya bao 1-1 dhidi ya Mgambo Shooting kwenye Uwanja wa CCM Mkwakwani, Tanga, leo.

 

Kwa matokeo hayo, timu hiyo imefikisha pointi 53, hivyo kulazimika kusubiri matokeo ya mechi zake mbili zijazo dhidi ya JKT Ruvu na Coastal Union kwenye Uwanja wa Taifa, Dar es Salaam, kuona kama itashinda zote na kuwapoka kombe watani wao wa jadi, Simba.

 

Hata kama Yanga itashinda Jumapili dhidi ya JKT Ruvu, bado ushindi huo hautawahakikishia ubingwa kwani watakuwa wamefikisha pointi 56 ambazo zinaweza kufikiwa na Azam wenye pointi 47, iwapo watashinda mechi zao zote tatu zilizobaki.

Hivyo, ili Yanga waweze kutwaa ubingwa kabla ya mchezo wao wa mwisho dhidi ya Simba Mei 18, watalazimika kuzifunga JKT Ruvu na Coastal Union, kitendo ambacho si rahisi kutokana na ugumu wa wapinzani wao hao.